شاعر: مولانا محمد ابراہیم نوری
حوزہ نیوز ایجنسی|
لبِ فرات رقم ہے یہ شانِ تشنہ لباں
خدا کی ذات ہے خود قدر دانِ تشنہ لباں
نمیدہ ہوگئیں سنتے ہی العطش کی صدا
کہ جانتی ہیں یہ آنکھیں زبانِ تشنہ لباں
فرات، دشت، علم،تیر،خشک مشکیزہ
ہے ایک غم کا جہاں، ہر نشانِ تشنہ لباں
فرات روتی رہی اور جانب کوثر
لبوں سے کر گئی پرواز جانِ تشنہ لباں
رواں ہے آنکھ سے پانی، گلہ ہے خشک ترا
تو لگ رہا ہے مجھے نوحہ خوانِ تشنہ لباں
بدل گئی ہے یہ چشمِ فلک بہ چشمۂ آب
زمیں پہ دیکھ کے اک کاروانِ تشنہ لباں
بریدہ دست سے کی ہے رقم، قلم کی طرح
کبھی مٹے گی نہیں داستانِ تشنہ لباں
بحالِ گریہ و تشنہ لبی سفر کیجے
برہنہ پا طرفِ آستانِ تشنہ لباں
ضرور ہونگے وہ سیراب حوضِ کوثر سے
جو کربلا میں ہوئے زائرانِ تشنہ لباں
اِدھر حسینٔ علیہ السلام اُدھر عباسٔ
ہیں دو جہان میں یہ ساقیانِ تشنہ لباں
یہ جلتے خیمے، اسیری،اداس، شامِ غریب
ہر اک ہے سسلۂ امتحانِ تشنہ لباں
حضور ساقیِ کوثر وہ سرخرو ہوں گے
سرِ سبیل ہیں جو میزبانِ تشنہ لباں
صدائے اَشھَدُ اَنْ لا الہ الا اللہ
یہی تھی دشت میں نوریَ اذانِ تشنہ لباں
۔۔۔۔۔۔۔۔۔۔۔۔۔۔۔۔۔۔۔۔۔۔
از قلم: مولانا ابراہیم نوریَ قمی
آپ کا تبصرہ